婆婆名叫李鳳仙。其實同婆婆見面都不過幾日，而傾偈嘅時間少之有少。你喺第一日嘅時候，就講咗你個名，因為喺以前有一款雪條名稱叫「鳳仙雪條」，所以你嘅花名係「雪條」。

我認為婆婆你係一個活在當下嘅人，喺你細個嘅時候無任何嘅目標，但係一直努力到而家。你話過其實憎恨係一件好無用嘅事，佢唔會令自己變得更好，我都好認同呢一種生活態度。我覺得你都好勇敢，雖然你話你喺有病痛時可以堅持，係因為你嘅丈夫同孫女，但係其實每個人都知道病痛嘅折磨係好難堅持落去，手術嘅前夕係好可怕，但係你都可以一直堅持住，所以我認為你係一個好勇敢嘅人。

你可以踏出改變嘅一步，人嘅一生會不斷改變，而係你嘅一生入面我都見到改變，由你過咗鬼門關開始，你就改變咗自己，開始做社工去幫助唔同嘅人，我好佩服你。

雖然你成日話你細個嘅時候冇咩想做，冇咩夢想，但係你而家就有好多故事可以同我哋分享，就好似飛機糖，佢嘅形狀、佢嘅顏色你仍然歷歷在目，就好似你嘅第一份工學習到嘅道理：「如果冇人做，你就要做，呢個係你嘅機會，將來會係你嘅資本。」

你嘅丈夫係小學嘅同學，佢同你表白嘅時候你逃跑，但係去到最後，你哋喺一個朋友嘅婚禮重遇，就好似漫畫、小説情節一樣，你哋就因為呢個機會再講返嘢，重新認識返大家，最後你哋「有情人終成眷屬」，一齊直到而家，喺之後你哋都互相扶持渡過唔少難關，呢件事當我聽到嘅時候，都覺得好夢幻，我當時話我唔太想戀愛，而你就同我講：「呢啲嘢我嗰陣時都係咁諗，大個嘅時候就唔係咁㗎啦。」而我因為人與人嘅信任，我選擇相信你。

最後，感謝水煮魚文化組織嘅「生命說」活動，令我有機會同李鳳仙女士見面、認識。